Psa 104 | YON | STEP | O ne kingkin, Yariman yaningko kankoona. O Yariman ne God, eb kuu darewoob arimbed, kwane eb kuu nambiriyiib dobiri manimanandewiib inwarewen.

Psalms 104

Yook 104

1 O ne kingkin,Yariman yaningko kankoona.
OYariman ne God, eb kuu darewoob arimbed,
kwane eb kuu nambiriyiib dobiri manimanandewiib inwarewen.
2 Ebka eb nambirimbed ebkad doboob areb kan dabunewen,
kwane ebbed ambid kuu dabua areb kan batangne binge koweneb,

3 ambid ari ye ok arimbed eb dobirimbon kuu arumewen.
Ebbed wiib ben eb seriot areb ongmeneb yarebimaab,
kwane nuub kan ayari on areb ongmeneb kuye buraab arimbed wan yarebimaab.
4 Ebbed nuub kuu ben eb weng benbidan kerundimaab,
kwane amot yumbu kuu ben eb demedan kerundimaab.
5 Ebbed okad yu ambokab ongmenabewen,
kowe kan dewenebinban aron korem.
6 Kwanekoreb karamok kuu dabua areb kan okad ari dabunendewen,
kowe ok kuu aangko aangko kebeneen.
7 Ok yaa ongkandewen kumbed kombiri wuneen,
eb nambadbed baandewen kumbed ok kuu wan wenemoon areb wenebeen.
8 Ok kuu aangkombon ari korondenu
kankubunen yiri dewenenu
ebbed ongmenabewen ye yumbon kurimbed wuneen.
9 Ebbed karamok wene burudandindeban ye yumbon nongkobewen kowe,
ok kuu ikakman okad kumundin dabunaunban.
10 Ebbed kirubdem ongmenabaawe ok kuu kankubunen yiri wenenu
aangko yara yara kere yiri wenebimaun.
11 Ok wenebaune okad yu dingkan korem kuu animaib,
donki kiib kangkon ok ane mikmonimaib.
12 Ayari onbed ok kaat yaa amiyiib yenbenabenib,
at kwari kuu yookiib wingkanabimaib.
13 Eb dobirimbon arimbed am yedme kowaawe aangko aangko ari winimaun,
kowe eb ambangkanabi yaambed yob iraane okad kubimaun.
14 Kereek kuu buromakau yi ani dowad ongmaawe dembimaan,
kwane yongbon yeman nimakarub yi ani dowad ongmaawe dembimaun.
Okad yirimbed animan yemoon dembimaib,

15 nimakarub ane yi niindem aom kubi ye wain ok ye nong yob dembaune,
nimakarub kube murubia kankooni ye olif ambodiib ye at kuu yowiib iraune,
aromkono kondi ye flawa ye wiit kuu yowiib irimaan kui.
16 Yariman ye at kuu ok ane mikmonimaib,
ambibkin Lebanon yu at sidaa yembed arumenaboon kui.
17 Kwari kuu onbed ami yenbenabimaib,
kwane on dareb kawanmo kwangkon menebe at feer kwarimbed amiyiib yenbenabimaib.
18 Naningkod kiib kuu aangkodem kiibdeb kwarimbed doriib,
kwane ba haireks kuu aangko kebed angkambed doriib.
19 Ebbed wood ku ongme kowewen kumbed amaroniib yongkonbi yaroniib kimingki yeman kereen,
kwane aron yu kubuni kiwaan kuu yukaad.
20 Ebbed amnoom ku ongmewen kumbed minimaan,
kwane dingkan kiib kuu amnoombed yarebimaib.
21 Laiyon kuu aye anem ande komkanabimaib,
kwane yi animan onmimaib kuu Godbed bangkandimaan.
22 Aron yaro minimaun kuu yi kuu wene bikderebimaib,
yi kuu yi angkimbon dem aom ikakman wene dibere unuk dangimaib kui.
23 Kwane nimakarub kuu wene yi demembon yaa deme awinaiwe
kwane wene oobne miriknimaan.
24 OYariman, eb ambangkenabi kuu yemoon kai.
Eb kuu meeni kangdommombed korem ongmenabewen,
kwane okad kwari kuu ongmenabewen ye kumkam kuu yemoonmo muubniwen.
25 Karamok kuu yakui, yara yara kuu darewoob ambab,
kwane kuri niindem yiri kuu okyiri dingkan yemoon kai, kimingkindeban,
dingkan embengiib darewoowiib wad doriib kui.
26 Kwane motod kuu kwarimbed dewenebimaib,
kwane kumaombed omyere darewoob lewaiyatan kuu ebbed ongmekoreb kaaneewe kuri iningkuk kamimaan.
27 Yi korem kuu ebbed animan maondaneewa ananuub manok ande dobirimaib,
kwane ebbed aron anam arimbed bangkandimaab.
28 Animan bangkandaawa bimaib,
kwane dowakeniib keraawa yiminmo kerimaib.
29 Eb murubia kan yeknaawa uniwon karakwon kerimaib,
yi inum kuu ebka kandaawa yoworenib ikakman okad kerimaib.
30 Kumban ebbed eb inum yi yaa kondaawa yi wadkeri kuu andowe dobirimaib,
kwane ebbed okad kumundin ongmendaawe yeeb areb ikakman kerimaun.
31 Yariman ye nambiri kuu aron korem kwane angkimborok,
Yariman kuu yembed komo komo ambangkanaboon yaa kubok.
32 Yembed okad kumundin wedmendaana yuka kiringmimaun.
Yembed aangko aangko yaa angkorondaane amarengiib dembimaan.
33 Ne wad dobaraniin yaron korem kuuYariman yaa yook wingkimamaniin.
Aron komoyiib kwane okad kiri dobaraniin yaron kuu ne God yaningko kankooni yook wingkimamaniin.
34 NembedYariman yaa kubimain kuu,
ne meeni inamen yaa kuu yembed amun ande kubok.
35 Kumban ambarakmenabidan kuu monmare okad kiri kee dowan kerok.
Kwane arewa kamenabidan kangkon dowan kerime.
O ne kingkin,Yariman yaningko kankoona.
Yariman yaningko kankoonime.